Молитвы, употребляемые во время болезней
МОЛИТВА О НЕДУГУЮЩИХ
Боже Отче наш, иже всякую болезнь и всякое ослабление Твоею благостию от человеческих телес прогоняеши, призри Благоутробне, на раба Твоего (имя), и милостивно исцели недуг его; преврати его к первому здравию, Господом нашим Иисусом Христом, емуже подобает всякая слава, честь и поклонение с Святым Духом, купно с Тобою во веки. Аминь.
МОЛИТВА О БОЛЯЩИХ
Отче святый, Врачу небесный душам и телом, пославый единароднаго Сына Твоего, Господа Нашего Иисуса Христа, исцеляющаго всякий недуг и от смерти избавляющего: исцели раба твоего (рабу твою) (имя) от всякия болезни, еюже обдержится, и оживотвори его (ю) благодатию Христа Твоего, молитвами Пресвятыя Владычицы нашея Богородицы и Приснодевы Марии, и всех Святых Твоих; яко Ты еси Источник всякого исцеления, Боже наш, и Тебе славу возсылаем с единородным Ти Сыном, и с присносущным Ти Духом, ныне и присно и во веки веков. Аминь.
МОЛИТВА ВО ВРЕМЯ ГУБИТЕЛЬНЫЯ БОЛЕЗНИ
Всемогий, предвечный Боже, согрешихом и беззаконовахом, и сего ради праведный Твой гнев постиже нас, и тень смертная обыде нас: но Владыко Человеколюбче, не хотяй смерти грешнаго, но да обратится и жив будет: призри на нас, в покаянии с сокрушенным сердцем и с слезами к Тебе припадающих и Тебе молящихся: отврати милостивно гнев свой от нас; устави болезнь и утоли язву напрасно губящую нас. Пощади, пощади люди своя, да живи и здрави суще славят Тя Отца, и Сына, и Святаго Духа, ныне и присно, и во веки веков. Аминь.
МОЛИТВА
Владыко, Вседержителю, Святый Царю, наказуяй и не умерщвляяй, утверждаяй низпадающия и возводяй низверженныя, телесныя человеков скорби исправляяй, молимся Тебе, Боже наш, раба Твоего (имя рек) немоществующа посети милостию Твоею, прости ему всякое согрешение вольное и невольное. Ей, Господи, врачебную Твою силу с небесе низпосли, прикоснися телеси, угаси огневицу, укроти страсть и всякую немощь таящуюся, буди врач раба Твоего (имя рек), воздвигни его от одра болезненнаго и от ложа озлобления цела и всесовершенна, даруй его Церкви Твоей благоугождающа и творяща волю Твою. Твое бо есть, ежи миловати и спасати ны, Боже наш, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
О БОЛЯЩИХ
ТРОПАРЬ, глас 4-й
Скорый в заступлении един сый, Христе, скорое свыше покажи посещение страждущему рабу Твоему, и избави от недуг и горьких болезней; и воздвигни во еже пети Тя и славити непрестанно, молитвами Богородицы, Едине Человеколюбче.
КОНДАК, глас 2-й
На одре болезни лежащаго и смертною раною уязвленнаго, якоже иногда воздвигл еси, Спасе, Петрову тещу и разслабленнаго на одре носимаго; сице и ныне, Милосерде, страждущаго посети и исцели: Ты бо един еси недуги и болезни рода нашего понесый и вся могий, яко Многомилостив.
СВ. ВЕЛИКОМУЧЕНИКУ И ЦЕЛИТЕЛЮ ПАНТЕЛЕЙМОНУ
ТРОПАРЬ, глас 3
Страстотерпче святый и целебниче Пантелеймоне, моли милостиваго Бога, да прегрешений оставление подаст душам нашым.
КОНДАК, глас 8
Избранный страстотерпче Христов и врачу благодатный, туне подаяй недугующим исцеления, песньми вохваляем тя, заступника нашего. Ты же, яко имеяй дерзновение ко Господу, от всяких бед и болезней свобождай нас, любовию тебе зовущих: радуйся, великомученице и целителю Пантелеймоне.
КОНДАК 13
О многострадальный и предивный страстотерпче Христов и целителю наш Пантелеймоне! Милостиво прием сие малое от нас приношение, от многообразных недугов исцели ны, и предстательством твоим сохрани от враг видимых и невидимых, и вечнаго мучения избавитися нам Господа умоли, да во царствии Его выну воспеваем: Аллилуйя.
